ಭಗವಂತ ಶ್ರೀಕೃಷ್ಣನಿಗೆ ಇದೆ 108 ಹೆಸರುಗಳು ಹದಿನಾರು ಸಾವಿರ ಹೆಂಡತಿಯರು ಇದು ನಿಜಾನಾ?

17/01/2022, 6:27 ಅಪರಾಹ್ನ 119 Comments

ಶ್ರೀ ಕೃಷ್ಣ ಸಾಂಪ್ರದಾಯಿಕ ಹಿಂದೂ ಧರ್ಮೀಯರ ನಂಬಿಕೆಯಂತೆ ವಿಷ್ಣುವಿನ ಹತ್ತು ಅವತಾರಗಳಲ್ಲಿ ಒಬ್ಬನಾಗಿದ್ದಾನೆ. ಮಹಾಭಾರತದಲ್ಲಿ ಶ್ರೀ ಕೃಷ್ಣನಿಗೆ ಪ್ರಮುಖ ಪಾತ್ರವಿದೆ. ಪಾಂಡವರ ತಾಯಿ ಕುಂತಿ ಶ್ರೀಕೃಷ್ಣನ ತಂದೆಯಾದ ವಸುದೇವನ ತಂಗಿ. ಮಹಾಭಾರತದ ಕಥೆಯಲ್ಲಿ ಶ್ರೀಕೃಷ್ಣನ ಪ್ರವೇಶವಾಗುವುದು ದ್ರೌಪದಿಯ ಸ್ವಯಂವರದ ಸಂದರ್ಭದಲ್ಲಿ ಅವನು ಅರ್ಜುನನ ಮತ್ತು ಪಾಂಡವರ ಗುರುತು ಹಿಡಿದು ಬಲರಾಮನಿಗೆ ತೋರಿಸುತ್ತಾನೆ.

ಶ್ರೀಕೃಷ್ಣ ಮೊದಲು ಸಂಹರಿಸಿದ್ದು ಹೆಣ್ಣನ್ನೇ. ರಾಮಾವತಾರದಲ್ಲೂ ಮೊದಲು ಸಂಹರಿಸಿದ್ದು ಹೆಣ್ಣನ್ನೇ. ಕಂಸನಿಂದ ಪ್ರೇರಿತಳಾದ ಪೂತನೆ ತನ್ನ ರಾಕ್ಷಸೀ ರೂಪವ ಮರೆಮಾಚಿ ಸುಂದರವಾದ ಸ್ತ್ರೀ ರೂಪ ಮಾಯೆಯಿಂದ ಧರಿಸಿ ಎಲ್ಲಾ ಮಕ್ಕಳನ್ನೂ ಸಂಹರಿಸುತ್ತಾ, ನಂದಗೋಪನ ಮನೆಯಲ್ಲಿ ತೊಟ್ಟಿಲಲ್ಲಿರುವ ಕೃಷ್ಣನ ಎತ್ತಿಕೊಂಡು ವಿಷಪೂರಿತ ಸ್ತನ್ಯಪಾನ ಮಾಡಿಸಲು ಕೃಷ್ಣನು ಎರಡೂ ಕೈಗಳಿಂದ ಗಟ್ಟಿಯಾಗಿ ಅವಳ ಸ್ತನಗಳನ್ನು ಹಿಡಿದುಕೊಂಡು ಪಾನಮಾಡಿ ಅವಳ ಪ್ರಾಣವನ್ನೇ ತೆಗೆಯಲು, ಆ ಪೂತನಿಯು ತನ್ನ ನಿಜರೂಪದಿ ಸಾಯಲು, ಆ ದೇಹ ಬಿದ್ದ ರಭಸಕ್ಕೆ ಹನ್ನೆರಡು ಮೈಲಿ ದೂರವಿರುವ ಮರಗಳೆಲ್ಲ ಮುರಿದವು. ಅವಳ ದೇಹದ ಕೋರೆ ಹಲ್ಲುಗಳು ರಥದ ಮರದಂತೆಯೂ, ಅವಳ ಮೂಗಿನ ದ್ವಾರಗಳು ಪರ್ವತದ ಗುಹೆಯಂತೆಯೂ, ಅವಳೆರಡೂ ಸ್ತನಗಳೂ ಬಂಡೆಕಲ್ಲಿನಂತೆಯೂ, ಹೀಗೇ ಅತಿ ಕ್ರೂರವಾಗಿ ಕಂಡಳು.

ಶ್ರೀಕೃಷ್ಣನಿಗೆ ಬರೋಬ್ಬರಿ 108 ಹೆಸರುಗಳಿವೆ. ಹೆಚ್ಚು ಖ್ಯಾತಿ ಮತ್ತು ಹೆಚ್ಚು ಭಾಗಗಳಲ್ಲಿ ಬಳಸುವ ಹೆಸರುಗಳು, ಅಚ್ಯುತ: ಚ್ಯುತಿಯಿಲ್ಲದವ, ಯಾವುದೇ ದೋಷ ಇಲ್ಲದವನು. ಅಸುರಾರಿ : ರಾಕ್ಷಸರಿಗೆ ಸದಾಕಾಲ ಶತ್ರುವಾಗಿದ್ದವನು. ವಾಸುದೇವ : ವಸುದೇವನ ಮಗ. ನಂದಗೋಪಾಲ: ನಂದ ಗೋಪನ ಮಗನಾಗಿದ್ದವನು. ಕಾಲದೇವ: ಯಮನನ್ನು ಮೀರಿಸಿದವ. ಗಿರಿಧರ: ಗೋವರ್ಧನ ಗಿರಿಯನ್ನು ತನ್ನ ಕಿರುಬೆರಳಲ್ಲೇ ಎತ್ತಿದವ. ಗೊಲ್ಲ: ಎಮ್ಮೆಗಳನ್ನು ಪಾಲಿಸಿ, ಕಾಪಾಡುವವನು. ವೇಣುಗೋಪಾಲ :ಕೊಳಲನ್ನು ನುಡಿಸುವವನು. ಚಕ್ರಧಾರಿ: ಚಕ್ರಾಯುಧವನ್ನು ಧರಿಸಿದವನು. ದ್ವಾರಕಾಧೀಶ/ದ್ವಾರಕಾನಾಥ: ದ್ವಾರಕಾನಗರಕ್ಕೆ ಒಡೆಯನಾದವನು. ಜಗನ್ನಾಥ: ಜಗತ್ತಿಗೆ ನಾಯಕನಾದವನು. ಜನಾರ್ದನ: ಎಲ್ಲರಿಗೂ ವರವನ್ನು ಕೊಡುವನು. ಪತಿತ ಪಾವನ: ಪಾಪಿಗಳನ್ನು ಉದ್ದರಿಸುವವನು. ಪರಬ್ರಹ್ಮ: ಬ್ರಹ್ಮನ ತಂದೆ (ವಿಷ್ಣು). ಪಾರ್ಥ ಸಾರಥಿ: ಅರ್ಜುನನ ಸಾರಥಿ. ಮಧುಸೂದನ: ಮಧು ಎಂಬ ರಾಕ್ಷಸನನ್ನು ನಾಶ ಮಾಡಿದವನು. ಮಾಧವ: ವಸಂತ ಋತು ತರುವವ. ಮಾಧವ :ಮಾ =ಲಕ್ಷ್ಮಿ -ಧವ =ಒಡೆಯ . ಮುಕುಂದ: ಮುಕ್ತಿಯನ್ನು ಕೊಡುವವನು. ಯೋಗೇಶ್ವರ: ಯೋಗಿಗಳಿಗೆಲ್ಲಾ ಸ್ವಾಮಿಯಾದವನು. ಶ್ಯಾಮಸುಂದರ: ಕಪ್ಪು ವರ್ಣದವನು. ಹೃಷೀಕೇಶ: ಹೃಷಿಕಗಳನ್ನು(ಇಂದ್ರಿಯ) ಹಿಡಿದಿಟ್ಟವನು. ಪುರುಷೋತ್ತಮ : ಪುರುಷರಲ್ಲೇ ಅತ್ಯುತ್ತಮನಾದವನು. ನವನೀತ : ತಾಜಾ ಬೆಣ್ಣೆಯನ್ನು ತಿಂದವನು. ಸುದರ್ಶನ : ಸುದರ್ಶನ ಚಕ್ರ ಹೊಂದಿದವ. ಮುರಳಿ : ಕೊಳಲನ್ನು ಹೊಂದಿದವ. ಘನಶ್ಯಾಮ: ಕೃಷ್ಣನ ಮೈಬಣ್ಣ ಮೋಡದಂತೆ ಕಪ್ಪು. ದಾಮೋದರ,ಪಾಂಡುರಂಗ,ಕೇಶವ,ವಿಠಲ,ಶ್ರೀರಂಗನಾಥ

ಗುರುವಿನ ಮಗನಿಗೆ ಪುನರ್ಜನ್ಮ ನೀಡಿದ್ದ ಕೃಷ್ಣ

ಶ್ರೀಕೃಷ್ಣನ ಗುರುಕುಲದ ಕತೆಗಳಲ್ಲಿ ಹೆಚ್ಚು ಪ್ರಚಲಿತ ಕೃಷ್ಣ-ಕುಚೇಲನ ಕತೆ ಆದರೆ ಅದೇ ಕಾಲಘಟ್ಟದ ಮತ್ತೊಂದು ಕತೆಯೂ ಇದೆ. ಕೃಷ್ಣ ಮತ್ತು ಬಲರಾಮ ಗುರುಕುಲದ ಶಿಕ್ಷಣ ಪೂರ್ಣಗೊಳಿಸಿದ ಮೇಲೆ ಗುರು ಸಂದೀಪನಿಯನ್ನು ಕೇಳುತ್ತಾರೆ ‘ಏನು ಗುರು ದಕ್ಷಿಣೆ ಬೇಕು?’ ಎಂದು, ಆಗ ಗುರುವು, ಸಮುದ್ರದಲ್ಲಿ ಬಿದ್ದು ಸತ್ತ ಮಗನನ್ನು ವಾಪಸ್ ತಂದುಕೊಡುವಂತೆ ಕೇಳುತ್ತಾರೆ. ಆಗ ಕೃಷ್ಣ ಬಲರಾಮರು ಪ್ರಬಾಸ ಸಮುದ್ರಕ್ಕೆ ಬಂದು, ಗುರುವಿನ ಮಗ ಸತ್ತು ಪಾಂಜನ್ಯವೊಂದರ ಒಳಗೆ ಇರುವುದಾಗಿ ತಿಳಿಯುತ್ತದೆ. ಅದನ್ನು ಸಾವಿನ ದೇವತೆ ಯಮನ ಬಳಿ ಹೋಗಿ ಮನವಿ ಮಾಡಿ ಬದುಕಿಸಿ ವಾಪಸ್ ಕರೆತರುತ್ತಾರೆ.

ಏಕಲವ್ಯನನ್ನು ಕೊಂದಿದ್ದು ಶ್ರೀಕೃಷ್ಣ

ಮಹಾಭಾರತದ ಪರಮೋಚ್ಛ ಬಿಲ್ಲುಗಾರರಲ್ಲಿ ಒಬ್ಬ ಏಕಲವ್ಯನನ್ನು ಕೊಂದಿದ್ದು ಶ್ರೀಕೃಷ್ಣನೇ ಎನ್ನಲಾಗುತ್ತದೆ. ಏಕಲವ್ಯ ಶ್ರೀಕೃಷ್ಣನ ಚಿಕ್ಕಪ್ಪ ದೇವಶರವುನ ಮಗ ಎನ್ನಲಾಗುತ್ತದೆ. ಇದರ ಬಗ್ಗೆ ಕೆಲವು ಗೊಂದಲಗಳೂ ಇವೆ. ಬೆರಳು ಕಳೆದುಕೊಂಡ ಏಕಲವ್ಯ ಆ ನಂತರ ಎಡಗೈ ಇಂದ ಬಿಲ್ವಾಬ್ಯಾಸ ಮಾಡಿ ಜರಾಸಂಧನ ಸೇನೆ ಸೇರಿಕೊಳ್ಳುತ್ತಾನೆ. ಕೃಷ್ಣ-ರುಕ್ಮಿಣಿಯನ್ನು ಎತ್ತಿಕೊಂಡು ಹೋಗಬೇಕಾದರೆ ಆತ ಅಡ್ಡವಾಗಿ ಬಂದ ಕಾರಣ ಕೃಷ್ಣನು ಆತನ ಮೇಲೆ ಬಂಡೆ ಎಸೆದು ಕೊಂದನೆಂದು ಕತೆಗಳು ಹೇಳುತ್ತವೆ. ಆದರೆ ಇನ್ನೂ ಕೆಲವು ಕತೆಗಳಲ್ಲಿ ಜರಾಸಂಧನ ಬಳಿ ಇದ್ದ ಏಕಲವ್ಯ ಜರಾಸಂಧನ ಸಾವಿನ ನಂತರ ಧುರ್ಯೋದನನ ಬಳಿ ಸೇರಿ ಕುರುಕ್ಷೇತ್ರ ಯುದ್ಧದಲ್ಲಿ ಪಾಲ್ಗೊಂಡು ಅಲ್ಲಿ ಹತನಾದ ಎನ್ನುವ ಕತೆಯೂ ಇದೆ.

ಕೃಷ್ಣನ ಹದಿನಾರು ಸಾವಿರ ಹೆಂಡತಿಯರ ಬಗ್ಗೆ

ಕೃಷ್ಣ ಎಂದ ತಕ್ಷಣ ಮಹಾಭಾರತದ ಕಾರಣಕರ್ತ , ಸ್ವಂತ ಮಾವ ಕಂಸನನ್ನು ಸಂಹಾರ 41ಮಾಡಿದವನು. ಹಲವು ರೀತಿಯಲ್ಲಿ ವರ್ಣಿಸುತ್ತೇವೆ. ಆದರೆ ನನ್ನ ಪ್ರಕಾರ ಕೃಷ್ಣ ಎಂದರೆ ಬರೀ ಲೀಲೆ ಅಲ್ಲ, ಪರಮಾತ್ಮ, ಅವನು ಒಂದು ಶಕ್ತಿ, ಒಂದು ನೀತಿ ಪಾಠ ಎಂದು ಹೇಳಲು ಇಚ್ಛಿಸುತ್ತೇನೆ.

ದ್ವಾಪರ ಯುಗದ ಕೃಷ್ಣನಿಗೆ ಹದಿನಾರು ಸಾವಿರ ಹೆಂಡತಿಯರು ಅಂತ ಹೇಳುತ್ತಾರೆ. ಕಳ್ಳ ಕೃಷ್ಣ ಹಾಗೆ ಹೀಗೆ ಎಂದು ಹೇಳುತ್ತಾರೆ. ಆದರೆ ನಿಜವಾದ ವಿಷಯ ತಿಳಿದುಕೊಂಡು ಮಾತಾಡಿದರೆ ಒಳ್ಳೆಯದು ಎಂದು ನನ್ನ ಅಭಿಪ್ರಾಯ.

ಹೌದು ಶ್ರೀ ಕೃಷ್ಣನಿಗೆ ಬಹು ಪತ್ನಿಯರು. ಆದರೆ ಎಂಟು ಪ್ರಮುಖ ಪತ್ನಿಯರು. ರುಕ್ಮಿಣಿ ಕೃಷ್ಣನ ಮೊದಲನೇ ಹೆಂಡತಿ. ರುಕ್ಮಿಣಿ ಶ್ರೀಕೃಷ್ಣನನ್ನು ಪ್ರೀತಿಸುತ್ತಿದ್ದಳು. ಶಿಶುಪಾಲನ ಜೊತೆ ಮದುವೆ ನಿಶ್ಚಯ ಆಗಿದ್ದರೂ ಕೂಡ ತನ್ನದೇ ಅಪಹರಣ ನಾಟಕ ಆಡಿ ಅರ್ಜುನನ ಸಹಾಯದೊಂದಿಗೆ ಕೃಷ್ಣನೊಂದಿಗೆ ಮದುವೆಯಾಗುತ್ತಾಳೆ. ಹಾಗೆಯೇ ಈ ಹದಿನಾರು ಸಾವಿರದ ನೂರು ಹೆಂಡತಿಯರ ಬಗ್ಗೆ ಹೇಳಬೇಕೆಂದರೆ ಅವರು ನರಕಾಸುರ ಎಂಬ ರಾಕ್ಷಸನ ಬಂದಿಯಲ್ಲಿ ಇದ್ದ ಕನ್ಯೆಯರು. ಹೌದು ಪುರಾಣದಲ್ಲಿ ನರಕಾಸುರ ಎಂಬ ಕ್ರೂರಿ ರಾಕ್ಷಸನು ಇದ್ದ. ಮಹಿಳೆಯರ ಮೇಲೆ ಅತ್ಯಾಚಾರ ಮಾಡುತ್ತಿದ್ದ. ಅವರ ಗಂಡಂದಿರನ್ನು ಕೊಂದು ತನ್ನ ಜಾಗದಲ್ಲಿ ಬಂದಿಸಿ ಇಡುತ್ತಿದ್ದ. ವಿಷ್ಣು ವರಾಹಾವತಾರ ತಳೆದಿದ್ದಾಗ ಬೆವರಿನ ಒಂದು ಹನಿ ಭೂಮಿಗೆ ಬಿದ್ದು ಭೂದೇವಿಯ ಮಡಿಲಲ್ಲಿ ಹುಟ್ಟಿದವ. ನಂತರ ದೇವತೆಗಳ ರಾಜ ಇಂದ್ರದೇವನಿಗೆ ದಿನಾಲೂ ತೊಂದರೆ ಕೊಡುತ್ತಿದ್ದ. ಇಂದ್ರದೇವನು ಶ್ರೀಕೃಷ್ಣನ ಸಹಾಯ ಕೇಳಿ ದ್ವಾರಕೆಗೆ ಬರುತ್ತಾನೆ. ಕೃಷ್ಣನು ಇಂದ್ರಾಣಿಗೆ ಅಭಯ ಕೊಟ್ಟು ಸತ್ಯಭಾಮೆಯೊಂದಿಗೆ ನರಕಾಸುರನ ಸ್ಥಳಕ್ಕೆ ಬರುತ್ತಾನೆ. ಯುದ್ಧದಲ್ಲಿ ನರಕಾಸುರನ ಬಾಣ ಕೃಷ್ಣನನ್ನು ಮೂರ್ಚೆಗೊಳಿಸುತ್ತದೆ. ನರಕಾಸುರನಸಂಹಾರಕ್ಕೆ ಸಾಧ್ಯವಾಗದ ಕಾರಣ ಅವನಿಗಿದ್ದ ವರ(ಭೂಮಿ ತಾಯಿ), ಅಂದರೆ ಹೆಣ್ಣಿನಿಂದ ಅಂತ್ಯ ಅನ್ನುವುದು. ಸತ್ಯಭಾಮೆ ಭೂಮಿ ತಾಯಿಯ ಅವತಾರ ಆಗಿರುವುದರಿಂದ ಸತ್ಯಭಾಮೆಯು ಹೂಡಿದ ಬಾಣ ನರಕಾಸುರನ ವಧೆ ಮಾಡಿತು. ಅವನ ಬಂಧನದಲ್ಲಿದ್ದ ಆ ಹದಿನಾರು ಸಾವಿರದ ನೂರು ಕನ್ಯೆಯರನ್ನು ಶ್ರೀಕೃಷ್ಣ ನು ರಕ್ಷಿಸಿ ತನ್ನ ಹೆಂಡತಿಯರ ಸ್ಥಾನ ನೀಡಲು ನಿರ್ಧರಿಸಿ ಅವರೆಲ್ಲರನ್ನೂ ಮದುವೆ ಆಗುತ್ತಾನೆ. ಯಾಕೆಂದರೆ ಅತ್ಯಾಚಾರ ಹೆಣ್ಣಿಗೆ ಆದರೂ ಲೋಕ ಅದರ ನೋವನ್ನು, ಅವಮಾನವನ್ನು ನೀಡುವುದು ಹೆಣ್ಣಿಗೆ. ಶ್ರೀಕೃಷ್ಣನ ಹೆಂಡತಿಯರು ಅನ್ನುವ ಮರ್ಯಾದಿಯ ಮುಂದೆ ಬೇರೆ ಏನು ಬೇಕು? ಇದು ಕೃಷ್ಣ ಹದಿನಾರು ಸಾವಿರ ಹೆಂಡತಿಯರ ನಿಜವಾದ ಕಥೆ. ನರಕಾಸುರ ವಧೆಯ ಅಂಗವಾಗಿ ನಾವು ದೀಪಾವಳಿಯನ್ನು ಆಚರಿಸುತ್ತೇವೆ.

ಕೃಷ್ಣಂ ವಂದೇ ಜಗದ್ಗುರು.